Huhuo Sebua luo Kami, 14 Mei 2026
Ba sura
Halöwö Zinengge andre, meno maoso Yesus moroi ba ngai zimate, so dombua gohitö sanura
ya’ia zinengge Yesu andrö sotoi Luka:
1. Yesu, Ifabü’u wa Ifatenge dania zanolo andrö Ehehe Ni’amoni’ö.
2. Yesu, Ifabü’u wa mangawuli la dania, hulö simane ba wanahae-Nia
3. Yesu, Ibe’e goroisa-Nia khöra sinenge-Nia (Rasul), ena’ö möi ira tobali samaduhu’ö ba sanuriagö Turia somuso dödö, i’otarai danö Yeruzalema irugi wondrege danö, Hal. Zinengge 1:8 Aboto ba dödöda wa fatua lö manahae Yesus möi Ia ba zorugö yawa no I’be’e tölu goroisaNias; 1. Ifatengen Geheha sanolo, 2. Manguwuli Ia dania, 3. We amöi ira sinenge ba wanuriagö turia somuso dödö.
HUHUO
1 No awai khõgu zura si fõfõna andrõ, ya’ugõ Teofilo,
no usura fefu nibõrõtaigõ Yesu, folau ba famahaõ, 2 irugi luo tefazawa ia, me
no ibe’e goroisa ba zinenge andrõ, ni’anutuyu’õnia Eheha ni’amoni’õ. 3 ba
ni’oya’õnia tandra, wangoroma’õ wa no auri ia, me no aefa itaõgõ wamakao andrõ;
õfa wulu wongi wa’ara i’oromaroma’õ ia khõra, i’ombakha’õ khõra ngawalõ mbanua
Lowalangi andrõ. 4 Ba me orudu ira, me manga ira, ba iwa’õ khõra, bõi larõi
Yeruzalema, labaloi gamabu’ula li Nama andrõ, nirongomi khõgu (iwa’õ). 6 Ba
lasofu khõnia si so ba da’õ, lamane: He Tua, hadia õfuli õ’a’azõkhi iya’e dania
nõri Ndraono Gizeraëli? 7 Ba imane khõra: Tenga si nangea ya’ami zangila bawa
ba bu’u li, nihonogõi Nama ba wa’abõlõnia, 8 ba mitema dania wa’abõlõ Geheha
ni’amoni’õ, si mõi khõmi, ba samaduhu’õ ami khõgu ba Yeruzalema, ba ba danõ
Yudaia, ma’asagõrõ, ba ba Zamaria, ba irugi wondrege danõ.
Ba ayati 1 Imane Luka khõ Teofilo, No awai khõgu zura si fõfõna andrõ, ya’ugõ Teofilo, no usura fefu nibõrõtaigõ Yesu, folau ba famahaõ Ba zinura Luka andre khö Teofilu, ba wa maduhu’õ wa no maoso Ia moroi ba lewatö ma moroi ba ngai zino mate. Ba fatua lõ manahae Ia mõi ba zorugo, so sinangea aboto ba dõdõda sitobali ibe’e wamahaõ khodra sinenge:
1. Oya tandra, wangoroma’õ wa no auri ia,
2. Sindruhu wa no aefa itaõgõ wamakao andrõ;
3. I’ombakha’õ khõra ngawalõ mbanua Lowalangi andrõ.
Simanõ zalua ba zi öfa wulu ngaluo no i’oroma’ö la Yesu khöra he gõi ba wamahaõ ba zo’amakhaita Mbanua Lowalangi andrö. Afuriata, ibe’e goroisa-Nia böi laröi Yeruzalema ena’ö labaloi fanema Eheha meno wu’usa Lowalangi khöra ya’ia wa ibe’e khöra Geheha Ni’amoni’ö, sanolo ba same’e khöra fa’abölö ba wangai lala halöwö fanuriagõ duria somuso dõdõ ba soi niha fefu ba zisagõrõ ulidanõ.
Ba wa’lõ abotoba dõdõra la fuli la sofu khõ Yesu sino irai Iwa’õ khõra Yesu; He Tua, hadia õfuli õ’a’azõkhi iya’e dania nõri Ndraono Gizeraëli? Fanofu da’e sindruhunia, fangoroma’ö wa ira sinenge Yesu aombö dödöra ira andrö la’anofuli, hewisa dania lualua Mbanua Lowalangi, hewisa ira dania, ba hadia nifaluara. Ba imane khõra: Tenga si nangea ya’ami zangila bawa ba bu’u li, nihonogõi Nama ba wa’abõlõnia, andrõ wa lõ latohugõ sinofura khõ Yesu me tenga da’õ sitobali lala halõwora.
Halõwõ ira sinege andre no iwa’õ Yesu khõra ba ayati 8 andre, me imane ba mitema dania wa’abölö Geheha ni’amoni’ö, si möi khömi, ba samaduhu’ö ami khögu ba Yeruzalema, ba ba danö Yudaia, ma’asagörö, ba ba Zamaria, ba irugi wondrege danö. Ayati 8 no sitobali Goroisa Fanuriaigõ (Amanat Penginjilan) turia somuso dõdõ khõ ndra sinenge Yesu. Tobali goroisa Yesus khõda dae gõi ba ginotõ ia da’a, ena’õ mõi ita enoni Yesu ba wanuriagõ turia somuso dõdõ, tabarõgõ ba wongambatõda zamõsana awena numalõ ba zifasuida.
9 Ba me aefa iwa’õ da’õ, ba tefazawa ia, anehe ira, ihalõ ia lawuo, ba lõ’õ
sa’ae oroma ia khõra.
Ba ayati 9 andre aboto ba dödöda wa manahae Yesus möi Ia ba zorugö yawa meno aefa ibe’e goroiza wanuriagö duria somuso dödö khödra sinege. Ba ayati 9 tesura tefazawa ia eluahania manahae Yesu, dae no halöwö Lowalangi satulö ba alua (fakta) me so ira difahaö-Nia samaigi ba sangila me manahae Ia möi ba zorugö. Ihalö ia lawua eluhania sindruhu wanumalö miyawa ba zorugö Yesu andre me yawa ba lawuo ma ba zorugö yawa numalö ia ba lakhömi Lowalangi Ama. Fanahae Yesu tobali fangaro wamati ira sinege ba wobörögö fanuriagö duria somuso dödö ba gulidanö na no latema göi dania Eheha ni’amoni’ö andrö.
Yaita niha keriso ba ginötö ia da’a da tabali’ö fanahae Yesu dane-dane wanga’i halöwö Lowalangi, he ba wamalua halöwö ba gosali he göi halöwö ba gotalua banua niha Keriso meno aboto ba dödöda wa no manahae Yesu möi ia ba zorugö ba lakhömi Nama andro, dumadao Ia ba gambölö nama si lö ambö fa’abölö ba wangandrö salahida he göi ba wama’anö naha khöda ba zorugo.
10 Ba me latõngõ mbanua si yawa, me mofanõ ia, ba hiza, darua zi so ba da’õ
khõra niha, sobaru safusi, 11 sanguma’õ gõi: Hana wa so ami ba da’e, wa mitõngõ
mbanua, ya’ami banua Galilaia? Mangawuli dania Yesu andrõ, nihalõ ba zorugo
moroi ba khõmi, si mane me mi’ila ia, me mofanõ ia ba zorugo.
Me manahae Yesus bahulö zatöngö ira fefu, latöngö mbanua si yawa, me mofanö ia, ba hiza, darua zi so ba da’ö khöra niha, sobaru safusi, sanguma’ö göi: Hana wa so ami ba da’e, wa mitöngö mbanua, ya’ami banua Galilaia?. So baru safusi andre ira mala’ika sanguma’ö wa Yesus no tefazawa ba zorugö wa mangawuli dania Ia, nihalö ba zorugo moroi ba khömi, si mane me mi’ila ia, me mofanö ia ba zorugo.
Wehede da’e tobali fanötöna ba zamati khö Yesu wa sindruhundruhu dania mangawuli Yesu andrö ba ginötö-Nia, simane fangi’ilami la bawanahae-Nia. Fangawuli-Nia itörö ba alua sifaudu ba gohitö dödö Lowalangi andrö. Fangawuli Yesus dania ba wanguhuku niha sauri awö si no mate ba he göi ba wame’e faauri silö’aetu ba niha si lö faröi khö Yesus iru ba gamozui götö danö. Andre böi faröi ita ba wanötöna fa;auri si lö aetu moroi khö Yesu Keriso, Maranatha.
FAMATÖFA
- Hewa’ae Yesu no iröi
ndra sinenge-Nia, ba sanohugö lala halöwö fanuriagö ba famaduhu’ö andrö,
lö mamalö ibe’e wu’usa li-Nia ba wangoroma’ö gohitö dödö-Nia si sökhi.
Folo’ö, falöfaröi ba famati ndra sinenge Yesu andrö zitobali duma-duma
khöda fefu ya’ita banua-Nia.
- Fanahae Yesu ba
Zorugo, ba wamaduhu’ö wa Yesu andrö si otarai moroi khö Lowalangi andrö wa
ifuli Ia khö Lowalangi Ama ba wa’asambua.
- Manahae Yesu möi ba
zorugö dumadao ba gambölö na si lö ambö fa’abölö ba wangandrö saliha banua-Nia
samati khö-Nia irugi wangawulinia ba wanguhuku niha sauri awö sinö mate.
Nifa’anö:
Pdt. Juliman Harefa
