FAMOLALA TÖDÖ ZINUMANA. V Moze 15:6-11

 

Lala Geraera ba PA

FAMOBÖRÖ

Ba daromali ni'angerönusida ma'ökhö andre ifarou ita ba wangoro'ö tangada ba wanolo niha sitosasa, sambö soguna. Andrõ moguna ta sofu ba dõdõda:

1.      Hadia so wehululu dödöda ba wanolo zitosasa?

2.      Hadia, wa fa'ahakhö dödö ba nawö, ba no sambua tandra wa yaita no sisara lal wamati khõ nawõda ?

V Moze 15:6–11 no sambua zura goroisa Lowalangi khö moze fatua lö larugi danö si no ihonogöi khöra Lowalangi.  Faza 15 andre no sambua zura sama'ema fangefa: fefu gömö teheta faböi afökhö dödö si tosasa. Ba ayati 6–11, ba da'e oroma khöda wa ohitö dödö Lowalangi ena'ö böi mu'osiwawöi niha sinumana.

I. ANGOSISILA

1. Howuhowu nitemada no buala Lowalangi (ayati 6)

6 No’a sa ibe’e khõu howuhowu andrõ Lowalangiu, Yehowa, si mane nifabu’unia khõu, tobali oya soi nibe’eu nifalali; ba ya’ugõ, ba alakha lõ õfalali gana’a, ba oya soi dania zi so barõ mbawau; ba lõ’õ sa si mõi ndra’ugõ barõ mbawa.

Dae sitobali dane-dane khöda ba wanolo awöda niha gulidanö ya’ia menotatema buala sino ifabu’u khöda Lowalangi. Ba Ayati 6 andre, ibotokhi ba dödöda wa moroi khö Lowalangi howuhowu, andrö börö da’ö ba niha samati khönia si no manema howuhowu, tekaoni ba wanohugö  howuhowu andrö ba niha sitosasa, tenga ha sanema howuhowu Lowalangi manö ita.  Okhöta nibe’e Lowalangi khöda ba no ndrela ba wanolo awöda. Naso khöda böi tobali fayawasada ba nawöda niha. Yehowa ba Ihöndrögö sa zifayawa tödö me mo okhöta Ia, ba l'ebua'ö dödö-Nia ba zangidendide'ö ya'ia.

2. Tatolo Niha si Numana (ayat 8-7)

7 Na so ba khõmi zi numana, iwami, ha niha, ba mbanuami, heza, ba danõmi andrõ, nibe’e Lowalangimi, Yehowa, khõmi, ba bõi zi lõ ahakhõ dõdõu, ba bõi gokhõi dangau ba niwami andrõ, si numana, 8 õbokai dangau khõnia, ba ya aoha gõlõu wame’e nifalali khõnia, ha wa’ebua zoguna khõnia, ba wa’ambõ andrõ khõnia, si no gõna ia.

I’o’ou ita ayat 8-7 ena’ö ta tolo awöda niha gulidanö si numa. Me imane taromali-Nias; õbokai dangau khõnia, ba ya aoha gõlõu wame’e nifalali khõnia  me da'ö sa zomasi Lowalangi.  Fanolo awö ba no bua wa'omasi. Haniha samokai tödönia ba wanolo sitosasa, ba no saboto ba dödö ia, wa no sebua wa'omasi Lowalangi ba wa'aurinia.

3. Böi Abuagölö Wame’e (9-11)

9 Ba angelama, fa bõi tumbu ba dõdõu gera’era si lõ sõkhi, fa bõi õmane dõdõu: No ahatõ ndrõfi si fitu andrõ, dõfi wangefa! ba fa bõi afõkhõ dõdõu wamaigiu iwami andrõ, si numana, fa lõ õbe’e khõnia, ba na i’angarõfi li dania Yehowa, ba khõmõ andrõ, ba tobali horõu. 10 Õbe’e khõnia ba bõi abua gõlõu wame’e khõnia; bõrõ sa wolau si manõ, wa ifahowu’õ dania ndra’ugõ Lowalangiu, Yehowa, ba nilaumõ fefu, hadia ia, halõhalõwõ dangau. 11 Lõ’õ sa aefa’aefa, wa so ba danõ zi numana, andrõ uwa’õ khõu: bõi abua gõlõu wamokai tangau ba niwami andrõ si tosasa ba si numana, ba danõmi.

Ayati 9: Böi tumbu ba dödöu gera'era si lö sökhi,...." na no ta tolo niha si numana. Lö moguna olohu ba wanolo andrö, böi so wa'aniha, böi tafatou wa isulöni khöda dania. He nalö la sulöni khöda iada'e, ba Lowalangi samösa, dania zanulöni khöda, ibe’e luoda ba ginötö-Nia

Ayati 10: öbe'e khönia ba böi abua gölöu,...."Na tatolo nawöda niha si numana ma sitosasa tödö böi so wa abuagölö. Ena’ö aohagölö wame’e. Sabölö ifaigi Lowalangi, hewisa dödöda ba wanolo andrö, hadia soroi ba dödö ma börö wa'aniha. Eluahania fame'e soroi dödö ba saohagölö wame’e, da'ö nifahowu'ö Lowalangi. Wa’aohagölö wame’e daö sitobali dela khö Lowalangi wamae’e göi khö sulö sino tafalua. Eluahania Lowalangi sanulöni sisökhi sino tafalua khö nawöda niha ba gulidanö.

Ayati 11: Lö'ö sa aefa-aefa wa so ba danö zi numana,...." eluahnia lö tebato ba wanolo sinuma ma sitosasa tödö.  Me lö aefa ba danö wa so zinumana.  Ba hiza niha samati khö Lowalangi tekaoni ba wamalua fa'ebua dödö Lowalangi, tobali ndrela howuhowu ba nawöda so'ambö'amböta.

 

II. AMARAHUTA

1. Fatua so ginötö falua wanolo, fangomasi'ö awö, ndrohundrohu wa'abölö.
2. Falua wanolo sifao fa'atulö dödö ba fa'owuawua dödö,

III. ANGERÖNUA

Fanolo si numana ba si tosasa no fogaoni Lowalangi ba niha samati khö-Nia.  Zinumana lö taya ba gulidanö andre, simanö göi halöwö wanolo lö taya ba wa’aurida. ba hiza tekaoni zamati khö Yesu ba wa mokai dangada ba wanolo yaira.

Sinangea tahalö khöda ba daromali andre:

1. Howuhowu Lowalangi, nitemada  mogunasa tobali fanolo niha sitosasa.
2. Fanolo niha sitosasa, ba no bua ba wolö'ö oroisa.
3. Fanolo, ba no ndrela ba wanema howuhowu moroi khö Lowalangi.
4. Fanolo, ba no tandra wa so khönia wamati sauri ba khö Yesu Keriso.
5. Fanolo niha sinumana no oroisa Lowalangi.

 

Nifa’anö: Pdt. Juliman Harefa